Frelsuð!

Ég og Jenný fórum á Frelsuð (Saved) í gær enda hafði Árni Svanur mælt með henni. Myndin stóð fullkomlega undir þeim væntingum sem ég hafði gert mér til hennar. Á námskeiði um helgina þar sem ég fjallaði um hvernig nálgast má unglinga, sagði ég að mér þætti ágætt að draga fólk í dilka til að auðvelda okkur að útskýra hegðun. Brian Danelly gerir einmitt þetta. Býr til fullkomnar steríótýpur og vinnur með þær á skemmtilegan hátt. Það eina sem kemur á óvart er eindregin og ákveðin guðfræði sem boðuð er í lokin, með eintali Mary (Jena Malone).

Það dró ekki úr skemmtigildi myndarinnar að koma síðan heim til sín og sjá litlu dóttur mína, sem einmitt er í kristilegum einkaleikskóla, liggja sofandi í rúminu sínu. Englavængirnir hangandi yfir rúminu hennar og tónlistin úr Tölvubiblíu Barnanna lágt stillt í geislaspilaranum inni hjá henni. Hvað er betra en að sofna við laglínu eins og:

Það er mín refsing:
Óþekku fólki ég farga,
fjölskyldu þinni og sjálfum þér
þó skal ég bjarga,
himinsins opna ég flóðgátt
og felli svo skrafið,
fólkið skal drukkna
og eigur þess skolast í hafið.