D og S

Mikið er blogað og bloggað um mögulega stjórn Samfylkingar og Sjálfstæðisflokks. Þar væri á ferðinni öflugur hópur þar sem að Pétrar Blöndalar og Jóhönnur Sigurðardætur gætu ekki sett stólinn fyrir dyrnar í neinum málum, hægt væri að bruna áfram, ekkert stopp. Ef könnun Bifrastar er höfð til hliðsjónar væri afstaða slíkrar ríkisstjórnar í helstu málum líklega á þessa leið.

• Áframhaldandi stóriðjustefna, aukin áhersla á sátt við íbúa á hverjum stað. sem þýðir á landsbyggðinni áframhaldandi uppbygging stóriðju.
• Evrópusambandsaðild til umræðu, sem hugsanlegur möguleiki einhvern tímann í framtíðinni. Engar raunverulegar breytingar.
• Áframhaldandi þátttaka í NATO, óbreytt staða í varnarmálum.
• Áframhaldandi einkavæðing.
• Aukin skólagjöld á háskólastigi. Rætt um að mæta skólagjöldum með styrkjum, en áfram leyst með námslánum.
• Óbreytt kvótakerfi.
• Áframhaldandi þróun, þar sem einkapraxis tekur yfir þá þætti heilbrigðiskerfisins sem hagnaðarvonin er mest. Óbreytt almannatryggingakerfi.
• Óbreytt ástand ríkis og kirkju.
• Verslun með léttvín og bjór gefin frjáls.
• Möguleiki á að draga úr ríkisstyrkjum og afnema innflutningshöft á landbúnaðarvörum. Án vafa stærsta mál slíkrar ríkisstjórnar. Myndi breyta öllum forsendum landbúnaðar á Íslandi.
• Óbreytt ástand í málefnum innflytjenda og útlendinga sem koma til starfa í landinu.