Af þeim sökum þarf veffríið að þessu sinni að vera betur skilgreint en oftast áður, enda er samspil vefofnotkunnar, fjölskyldu og vinnunnar fremur flókið. En alla vega, þetta eru helstu viðmiðin að þessu sinni.

• Ég mun ekki lesa eða horfa á fréttamiðla á vefnum, tvít, blogg-síður eða almenna vefi. Þetta felur í sér að ég mun ekki notast við Google-Reader-inn minn eða notast við video-vefi líkt og google video, Netflix, youtube.com eða ESPN360. Nema vinnutengdar ástæður krefjist þess og þá aðeins á vinnutíma.
• Ég mun ekki skrifa færslur á bloggsíður eða svara ummælum.
• Ég mun ekki fara inn á Facebook nema vegna vinnutengdra verkefna og þá aðeins á vinnutíma. Ég mun ekki svara persónulegum athugasemdum á veggjum, skrifa á eigin vegg, né lesa persónulega fréttayfirlitið.

• Ég mun áfram notast við Evernote, Wunderlist, DropBox, TripIt, Flict Tracker, gCal, bankavefi, dominos.is og bus.is utan vinnutíma.
• Ég mun auk þess notast við Skype og gChat í samskiptum við fjölskylduna, ásamt því að hlaða vikulega niður nýjasta þætti Justified á iTunes.
• Að þessu sinni geri ég ekki breytingar á tölvupóstnotkun.

Sabbatical-ið hefst á miðnætti 5. febrúar 2012 og lýkur á 13. mars 2012 kl. 8:00.

Frásögnin af Pétri, Jesús, Móses og Elí á fjallinu skýtur upp kollinum hjá mér reglulega. Ég hugsa um hana þegar ég heyri eftirsjána eftir 2007, ég velti fyrir mér hvort neysluviðmið ríkisstjórnarinnar á sínum tíma væru tilraun til tjaldbúðargerðar á fjallstindi og ég hugsaði um sjálfhverfu Tómasar í ljósi sjálfhverfu íslensku þjóðarinnar þegar það er talið eðlilegt viðmið að fjögurra manna fjölskylda á Íslandi eyði þrefaldri meðalinnkomu 80% mannkyns í frístundir á mánuði.

Þannig er geggjað að velta fyrir sér neysluviðmiðunartölunum í ljósi þessarar síðu hér: http://www.globalissues.org/article/26/poverty-facts-and-stats

Neysluviðmiðin eru um margt tjaldborgin sem Jesús sagði Pétri að byggja sér ekki. Í viðmiðunum er ekki gert ráð fyrir öðrum. Þau gera ekki ráð fyrir neinu líknarstarfi eða stuðningi við aðra. Ekkert rými fyrir gjafir utan heimilis. Neysluviðmiðin endurspegla sjálfhverfuna eina á kostnað heimsins.

Í lögum má kveða á um kirkjuskipan ríkisins.

Nú samþykkir Alþingi breytingu á kirkjuskipan ríkisins og skal þá leggja það mál undir atkvæði allra kosningabærra manna í landinu til samþykktar eða synjunar.

Hugmyndin með að kirkjuskipan geti verið bundin í lög snýst ekki um trú eða trúfrelsi, þ.e. kirkjuskipaninni er ekki ætlað að hafa áhrif á trúariðkun landsmanna, enda kemur skýrt fram í 18. grein að trúfrelsi ríki. Við hljótum því að spyrja hvers vegna kirkjuskipan sé og skuli vera lögbundin, nema meirihluti kosningabærra manna í landinu samþykki og svarið felst í greininni.

Kirkjuskipan og umgjörð evangelísk lúthersku kirkjunnar er ekki einkamál þeirrar kirkjudeildar, heldur háð hugmyndum meirihlutans. Þannig gæti komið upp sú staða að minna en helmingur landsmanna tilheyri kirkjunni, en ríkið getur ákveðið að ráða skipun hennar. Í slíku tilfelli gæti meirihlutinn utan kirkju sem best ráðskast með skipun trúfélags sem það tilheyrir ekki.

Kirkjan er ekki sjálfs síns ráðandi. Ég hef skrifað um þetta áður, er ég skammaðist yfir Aumingjagæsku og hroka í garð kirkjunnar fyrir 7 árum og það á enn við. Hugmynd þeirra sem sátu í stjórnlagaráði virðist fyrst og fremst að vernda kirkjuna fyrir sjálfri sér og koma þannig í veg fyrir að hún geti starfað sem kirkja.

Hvers vegna njóta ranglátir velgengni, af hverju lifa svikarar óhultir?

Jeremía er hótað lífláti vegna prédikunar sinnar og snýr sér því að Guð. Af hverju er lífið ekki gott og einfalt hjá þeim sem treystir Guði, meðan illmenni fá að njóta alls þess besta?

Við sjáum í 12. kaflanum þekkt orð sem koma fyrir í sálmi 139.

Drottinn, þú þekkir mig og sérð mig,

þú hefur rannsakað hjarta mitt.

Áminning um það sem ég missti af í 1. kafla Jeremía. Að annað tveggja er Jeremía skrifað undir áhrifum sálmaskáldsins sem skrifaði sálm 139 eða öfugt.

Kaflinn er krafa um að standa upp, snúa við, sætta sig ekki við ástandið, fljóta ekki að feigðarósi. Vissulega er þjóðin hrunin, einhverjir hafa verið fluttir á brott, en það er enn hægt að vona á framtíðina, en þó aðeins ef við snúum við.

Ég hata, ég fyrirlít hátíðir yðar.
Ég hef enga ánægju af samkomum yðar.
Jafnvel þótt þér færið mér brennifórnir og kornfórnir
lít ég ekki við þeim,
né heldur matfórnum yðar af alikálfum.
Burt með glamur sálma þinna sem aðeins er hávaði.
Ég vil ekki heyra hörpuleik þinn.
Réttvísi skal streyma fram sem vatn
og réttlæti sem sírennandi lækur.

Jeremía er hótað fyrir viðvörunarorð sín. Honum er sagt að ef hann hætti ekki boðun sinni muni hann deyja.

En Drottinn er hinn sanni Guð, hann er lifandi Guð og eilífur konungur.

Jeremía minnir á að skurðgoð og styttur úr gulli eða silfri, sé bara það, styttur úr gulli og silfri.

Þær geta ekki gert neitt illt og þær geta ekki heldur gert neitt gott.

Drottinn Ísraelsþjóðarinnar sé hins vegar Guð, sá sem skapaði jörðina með krafti sínum, sá sem lifir með okkur. Bæn Jeremía er að Guð miskunni sig yfir sig, þó hann eigi það ekki endilega skilið.

Hinn vitri hrósi sér ekki af visku sinni, hinn sterki hrósi sér ekki af afli sínu og og hinn ríki hrósi sér ekki af af auði sínum. Nei, sá sem vill hrósa sér hrósi sér af því að hann sé hygginn og þekki mig.

Því að ég Drottinn, iðka miskunnsemi, rétt og réttlæti á jörðinni, á því hef ég velþóknun, segir Drottinn.

Það að þekkja Guð í huga Jeremía er að láta sjálfsmynd sína skína af miskunnsemi, rétti og réttlæti.

Við vitum auðvitað vel að Páll postuli starfaði sem tjaldgerðarmaður meðfram boðunarstarfinu og langt fram á 20. öldina kenndu prestar eða voru í búskap á Íslandi. Á síðustu 50 árum hefur það breyst á þann veg að prestsþjónusta hefur verið skilgreind sem fullt starf víðast hvar og laun presta á Íslandi hafa hækkað verulega.

Þessi þróun sem gerðist m.a. í skjóli samningsins milli ríkis og kirkju um yfirtöku kirkjujarða nálgast endapunkt. Ef frekari breytingar verða á fjármálum íslensku kirkjunnar á næstu árum þá er ósennilegt að launastrúktúr prestanna lifi það af, sem gæti kallað á tvíþætta köllun þjóna kirkjunnar.

Slík þróun mun ekki eiga sér stað yfir nótt. Enda kallar hún á róttæka endurskoðun á menntun presta. Það er ekkert grín að ætla að fara í 5 ára háskólanám til þess eins að vinna hlutastarf um kvöld og helgar. Þessi þróun, ef af verður, mun líka gera gífurlegar kröfur um endurskilgreiningu og endurskipulag prestsstarfsins eins og það hefur þróast í seinni tíð, t.d. á Íslandi.

Það er ljóst að næsti biskup getur hummað þessa þróun fram af sér. Enda er ósennilegt að það reyni á þessa þróun á næstu 6-12 árum. Hins vegar mun biskupinn sem tekur við í kjölfar 500 ára afmælis siðaskiptanna í Evrópu, þurfa að horfast í augu við harkalegan veruleika ef ekki verður byrjað að hugsa um framtíðarfjármál kirkjunnar án ríkisins mjög fljótlega.

Guð grætur þjóð sína sem lætur ekki segjast.

Með öðrum orðum ef ég fengi 10.000 króna lán frá Múla 1. febrúar, þá myndi ég skulda 13.450 krónur 1. mars,  18.090 krónur 1. apríl …, 260.582 krónur 1. janúar árið eftir og loks eftir eitt ár 350.483 krónur (Reyndar með fyrirvara um að það er ekki hægt að framlengja láninu án fyrirhafnar í meira en 60 daga).

Svona lánafyrirgreiðsla beinist fyrst og fremst að ungu fólki og fólki sem er í mjög “desperate” aðstæðum og er e.t.v. er ekki mjög meðvitað um vaxtaútreikninga og á erfitt með að sjá heildarmyndina þegar kemur að fjármálum. Með öðrum orðum, Múla leitast við að misnota sér þekkingarleysi og erfiðleika fólks til að græða peninga. Auglýsingarnar beinast að ungu fólki. Á vefsíðunni er talað um peningamál á mannamáli, en samt er ekki hægt að sjá útreikninga á ársvöxtum. En ég skal tala á mannamáli.

Einstaklingarnir sem standa á bakvið fyrirtækið Múla eru siðlausir og leitast við að maka krókinn á þeim sem verst standa. Starfsemi eins og sú sem þeir bjóða upp á er okkur öllum til minnkunar. Í krafti eigin aðgengis að fjármagni, mergsjúga þeir þá sem síst skyldi. Svona starfsemi er ömurleg og hreinlega með ólíkindum að svona starfsemi sé leyfð á Íslandi.

Því miður er ekki hægt auðvelt að finna hverjir standa að baki fyrirtækinu. Heimilisfangið er í Garðastræti og fyrirtækið sem er skráð fyrir léninu heitir TEXTIT ÍSLAND ehf og sagt til heimilis á Reykjavíkurflugvelli. Ef leitað er í fyrirtækjaskrá má reyndar sjá að bæði fyrirtækið Mula ehf og Textit Ísland eru skráð á sama lögfræðing.

En hvað um það, mér er stórkostlega misboðið og minnugur þess að við eigum ekki lengur að þegja heldur benda á illskuna og misgjörðirnar í samfélaginu þá er þetta mitt framlag í dag.

* Í færslunni stóð upphaflega að um væri að ræða 3504% vexti og kostnað á ársgrundvelli. Því miður varð mér á smávægileg reikniskekkja sem ég biðst afsökunar á. Hið rétta er að vextir og kostnaður á ársgrundvelli er 3404%. Yfirleitt munar um skekkju upp á 100%, en í þessu tilfelli hefur það mjög óveruleg áhrif á efni færslunnar.